毛記真.感動,維基真.捉蟲| 黃一恒

【2016年01月12日 12:02 下午】毛記真.感動,維基真.捉蟲| 黃一恒


毛記電視炮製的金曲分獎禮,感動了很多香港人。

而我睇毛記電視,更睇到王維基真係捉蟲。

王維基花太多錢做電視劇,但啲劇又唔見得真係好有吸引度,而且燒完銀紙持續唔到。王維基一路唔肯做非劇集類節目,我唔係好明。

非劇集節目成本低,而且靈活性高,可以邊播邊睇反應邊去tune。唔似得劇集,要花一舊錢和時間拍完,反應好唔好唔知,點都要播埋佢,如果腰斬便血本無歸。

除了拍劇問題,HKTV的宣傳方式亦十分老餅,在地鐵站及巴士等地方瘋狂地燒錢為新劇賣平面廣告,係造到一剎那的氣勢,但入唔到肉,亦不能持久。網絡世界自有其他既平宜亦更有效的宣傳方式。HKTV拿不到電視牌而決定轉戰網絡,好應該想方法讓人係facebook去分享及討論佢的片段,而唔係單靠傳統平面廣告做宣傳。

至於毛記電視,好聰明,用番幾十年前歡樂今宵的橋。但配合到當下時局,節目讓人產生共鳴,笑中有淚。從來創作無話一定要全新,在現有基礎上再發揮,感動到人就係好創作。

而毛記新聞每節好短,又好適合網上播放。肯用腦,做嘲笑式新聞,要找每日生活中的題材其實不難,因為現實社會已經非常荒謬。而毛記另一個好嘢之處就係發掘到一班新進演員,好似東方昇,我估有上網的人都唔會唔識。條橋ok演員又交足戲,幾分鐘的節目觀眾開心有得笑,自然會幫手share。

做到了口碑有觀眾,自然會有廣告客戶。有可觀性的內容,自然又會有頻道肯簽約去播你啲節目。有廣告收益及播放渠道,以及知道觀眾對咩節目內容有興趣,就可以增長某類節目的時間。同時亦繼續有營運資金去炮製新的短小節目,以測驗市場反應。

所以我由頭到尾,都唔認為HKTV的失敗在於無發牌,而係做唔到吸引人的content。

創意產業從來最重緊係食腦,唔一定要燒錢。

當然,一男子基於神秘理由唔發牌俾維基,我地要繼續痛斥,但無牌是否做不出好創作呢?毛記夠無電視版啦,照樣感動咁多人。至於,即使電視發牌機制公平,有錢有實力的人,是否一定要去爭取電視牌照呢?互聯網時代告訴大家:不是!現在播放渠道根本不缺乏,講到尾最緊要係有content。

毛記電視用的橋一定不新,但勝在誠意十足,能否持續下去呢?真的無人知,起碼毛記肯試左先。TVB曾經令香港人引以為豪,現在變成過街老鼠。毛記會否有淪落的一天?根本不重要,江山自有人才出,一雞死自有一雞鳴。最重要是香港人肯不斷發揮創意,承傳和發揚香港的地道文化!


相關文章