袁彌明下屆應正式排頭位參選︱黃一恒

【2016年09月12日 3:56 上午】袁彌明下屆應正式排頭位參選︱黃一恒


剛剛看到袁彌明在電視鏡頭面前喊住宣布自己要辭任人民力量主席,誰不憐愛?

另外,袁彌明的講法十分得體。做政黨領袖就是這樣,選舉失利,唔理三七二十一,乜都要自己攬上身,話自己做得唔夠好呀、自己能力唔夠呀。當然,選舉失敗有千萬個原因,但內部分析和想罵人,私底下講好了,在公開場所,乜都自己攬曬上身,唔好搵嘢抵賴,唔好諉過於人。民主政治的好處係,全世界有曬失敗點應對的通例,照住做,唔駛怕冇面,下次選舉又係一條好漢。而政黨主席敗選辭職又係常態,冇乜大不了。

有觀眾緣卻只做抬轎實在浪費

再講,我認為袁彌明如果正式自己排頭位參選,贏面極大。雖然袁彌明有兩次參選立法會經驗,但兩次都係排第二名為黨友抬轎,未算正式出山。如果袁彌明想為自己的政黨穩坐一席,或者想落實貫徹香港人要議會內外抗爭的信念,袁彌明理應下次自己拍頭位參選。

點解我話袁彌明參選贏面大?因為佢有天生觀眾緣。論選舉,但凡外表斯文,談吐得體的人,都有觀眾緣這個優勢。不信?先不理會政見,看看近年冒起的政治人物:楊岳橋、梁天琦、劉小麗、鄭松泰、鄺俊宇、陳志全、容海欣。我肯定我引容海欣實有人話唔鍾意佢,話佢咁低能,但在我的分析框架內,一定要包埋容海欣。

先唔好講容海欣呢一筆,講建制派老大哥民建聯,近年已經成功換血,換走曬那些表情木訥,老氣橫秋的傳統左派人士,取而代之的先有李慧琼,再有近日彈起的周浩鼎。那麼,新民黨出了個容海欣而又成功當選,就一點都不出奇。至小跟陳玉娥一比,你就明白,唔係愛CY就可以贏,候選人的賣相真係好緊要。

建制派深明觀眾緣之道早已成功換血

雖然話建制派有「神秘配票力量」,但點都好,暗黑力量只能夠維持一個基本盤,要選贏仍然要靠候選人自己去吸引「搖擺選民」來投票。而我肯定建制派深明觀眾緣的重要性。

再舉其他例子,鄭松泰的斯斯文文相對於黃洋達的惡形惡相,鄭松泰有觀眾緣得多。譚得志(快必)那種撩是鬥非格,我一向覺得他當選機會微,但陳志全(慢必)行出來個樣就正路好多。

至於劉嘉鴻,雖然這次立法會選舉期間,不少人讚佢叻:熟政策、辯才好,加上能夠用流利英語跟司馬文辯論,教人拍爛手拿。有人替劉嘉鴻不值,為何那麼有「能力」的人,不能當選。我特登用引號引住「能力」兩個字,就要看你怎樣介定能力囉。選舉講的「能力」,十分多元化,其中觀眾緣佔很重要因素。而以我個人觀察,加上剛剛兩屆選舉得票數字,劉嘉鴻的確欠了些觀眾緣。

要記住,觀眾唔係黎睇辯論會。要睇辯論會,去睇中學生、大學生辯論比賽啦,但又有幾多個人會有興趣睇?普通市民,最吸引佢地眼球係一線明星呀。唔好問我點解有個老戲骨永遠只能做配角,有明星相的新人一出來就擔正做主角。咁簡單的道理你都唔明?綠葉是用來伴牡丹,但人民力量的香港島名單,卻拿牡丹去伴綠葉,豈不浪費?吸唔到票,一啲都唔出奇。

如果你話我呢個觀眾緣分析框架膚淺,Sorry,我講的係一個現實。記得陳雲時常在他的facebook標榜自己很懂得現實政治,但以陳雲的賣相和個人談吐咁都出來參選,真的很不現實。所以我實實在在的告訴你,參選的政治現實就是:派個有觀眾緣的候選人出來可以佔到好大優勢。而選民亦好聰明,識計數,明知票數唔足以令人力名單二人一齊當選,那麼即使袁彌明合我眼緣,但排第二明知沒機會當選,咁不如投另一張名單啦。所以話拿袁彌明抬轎實在浪費。

有了觀眾緣吸引人來睇你,你都要有貨賣。所謂有貨賣,其實唔複雜,你只要有一樣嘢,讓選民可以辨別到你就得。以容海恩為例,即使佢回答問題時一團糟,但只要佢人肉錄音機般不斷說自己「反對拉布,Win Back Hong Kong」,基本上選民已經識別得出佢,要投佢票的人自己投。自稱「法律界桂綸鎂」成為話題亦係很聰明的一步棋。

袁彌明具備綜合條件

道理講完,最後講番袁彌明本身。袁彌明同埋佢一班戰友,本身就有一套政治信念,所以袁彌明唔憂無貨賣,問題在於點樣取材和如何表達。至於袁彌明的表達能力,又係冇得挑剔。袁彌明由最初創業到現在,我一直都有留意。基本上袁彌明運用佢卓越的表達技巧,將複雜的護膚知識簡單化,並成功說服到一班觀眾轉化成顧客,跟住佢使用護膚品(生意已擴展至其他生活用品),再加上佢經營得當,生意越做越大。

袁彌明個人具備的綜合能力,令我有信心如佢下屆正式出山參與,自己在名單排頭位,可以創出理想成績。當然,人生有好多選擇,如果專注做好自己盤生意,好好黐實自己個老豆,已感到十分幸福,我又覺得佢真係無謂出來參選咁辛苦,因為政治實在凶險,而且好多時吃力不討好。但我觀察袁彌明和佢一班戰友,並非係輕言放棄的人,不會因為輸了一次選舉個個嚷著移民或收山。如果袁彌明選擇不放棄,為理想為香港人福址,下屆就應該正式排頭位參選。


相關文章

最新文章