係記憶力差?還是自知自己講的都是廢話?︱鍾劍華

【2017年01月19日 5:19 下午】係記憶力差?還是自知自己講的都是廢話?︱鍾劍華


朝早喺電台,市民不滿粉嶺高爾夫球場幅地,點解唔用得。佢答話因為幅地上面有好多樹,香港有樹木保護政策。
兩個鐘頭後,佢喺立法會咁講:

講到有啲情況下,議員因為配套未完善,包括街市、交通等問題,沒有盡快通過政府的建屋撥款申請。

梁振英當時是這樣說的:(字眼不一定完全準確,但意思我記得好清楚,應該沒有扭曲)

『我成日都咁講,凡事「有大道理,有小道理」。要識分輕重。啲人等屋住,要上樓,係「大道理」。塞車,我哋個個都唔想,未有街市,可能有啲唔方便,但呢啲都只係「小道理」。唔應該因為塞車,或者有少少唔方便,就拖慢有住屋需要的家庭上樓』。(當然,講的時候,要在表情及語氣上加上幾點輕蔑,以表達佢對議員的蔑視和不滿,也表達自己比議員聰明及睇得通)

如果係咁,是否表示唔斬D樹(或不去遷移D樹),係比開拓土地起樓更大嘅道理?

即係話:

粉嶺高球場地唔郁得。

CY邏輯第一條:「樹」比「揾地起樓」係更大的道理。

但佢份施政報告話,要考慮在郊野公園起樓喎。

CY邏輯第二條:「揾地起樓」比「樹」係更大的道理。

咁究竟「樹」係大道理?抑或係「揾地起樓」至係大道理。

梁振英的邏輯就是隨時搬龍門,標準任佢講嘅邏輯。而且佢啲標準,有時只係得個零鐘頭命!

其實我都覺得自己好多餘,思歪有名你叫,講嘢邊度洗講邏輯?邊使講道理?

係佢自己記憶力差?抑或係佢以為所有人可以喺短短一個鐘頭之內忘記佢講嗰啲乜?或者,可能佢都知道自己嘅講嘅全部都只係廢話。


相關文章