鄧寇克大行動「唔好睇」︱黃一恒

【2017年08月03日 5:37 下午】鄧寇克大行動「唔好睇」︱黃一恒


二戰為題材嘅戰爭片真係睇唔少,好多都「好好睇」。論戰爭震撼嘅張力,大家一定唔好錯過Saving Private Ryan第一場係諾曼第登陸嘅搶灘戲,血肉橫飛,如親臨其境。講靚仔,近年印象極深刻嘅戲係佔領旺角期間,我係旺角百老匯睇嘅Fury,畢彼特喎大佬!講扭橋扭得勁,少不免令人諗起The Imitation Game,將電腦發明家圖靈嘅生平融入去二戰歷史大舞台,以破解密碼為題材去演譯戰爭,亦令人耳目一生。

講番近日話題之作《鄧寇克大行動》,堅係「唔好睇」,原因係冇乜睇頭。論戰爭張力,唔覺有囉,戰鬥畫面不外乎從未露過面嘅德國陸軍向英國兵遠距離射擊。係有德國轟炸機向海灘上嘅英國兵放轟彈,但只係零零碎碎,唔算好震撼。理論上最有睇頭嘅空戰,鏡頭望上一大片天空,來來去去只得幾架戰機係度追逐下,並冇好懾人嘅氣勢。

講靚仔咩,Sorry呢套戲堅係欠奉。先講貫穿全套戲嘅主角英國二等兵Tommy,我堅係覺得佢個樣三尖八角,而整套戲佢嘅眼神真係鬼鬼鼠鼠,極之不討好。其他角色更不在話下。

至於戲情啦喎,其實堅係好平鋪直敍。有啲評論者話電影分成海、陸、空三個空間拍攝,好高章,但我唔覺有咩突別囉。睇Gundam都係有時係外太空,有時係陸地打架啦。不管是甚麼空間,整套係嘅劇情只有一個,而且不斷重覆,就是某地點發生某個軍事衝突,然後有啲人死左,有啲人冇死,直至結局,完!

但正正因為整套戲都「唔好睇」,才顯得個導演高章。論震撼力問題,戰爭唔係下下咁波瀾壯闊架老友!尤其係真實歷史上嘅鄧寇克大行動,堅係一場不折不扣嘅逃跑行動。我曾經用「鄧寇克大逃竄」去戲稱歷史上的海灣撤退事件,朋友話英軍井井有條地撤退,保存了實力為日後反攻歐洲大陸做準備,叫我唔好咁唔尊重啦。

但我睇完《鄧寇克大行動》就覺得整套戲嘅主題就係逃竄,留番條命就係勝利丫嘛,逃竄唔係咩醜事。點解我話男主角整套戲眼神都鬼鬼鼠鼠,因為佢由頭到尾都不斷動腦筋諗法子逃竄丫嘛!德國佬一陣轟炸完畢,男主角係沙灘上見到傷者,就靈機一觸同另一個士兵拿起擔架搬運傷者。你以為佢咁好心咩?係因為佢知道搬傷者可以打尖提早上船著草咋。

喂,乜英國人唔係好高尚,個個都好Gentleman架咩?Sorry囉,依家走緊難,死裡求生嘅時間,沒有誰比誰更高尚!好似另一場戲,講一班英國士兵係咁推開另一班法國士兵,話呢隻係英國船,只運英國人,唔該你班法國人去坐法國船啦。法國人睇完出來冇抗議話嚴重傷害法國人感情,英國人睇完亦冇申冤話話醜化英國人。典解嘅?因為大家心裡明白,呢套戲嘅好睇之處係將人性唔好睇嘅一面坦白地表露出來,所以睇嘅觀眾唔會玻璃心。

成套戲冇乜邊個靚仔,只因為呢套戲係講一個普通人嘅電影。像邱吉爾呢種戰爭時期大人物,只是在閒談間提到佢個名和戲末以讀報形式出現。成套戲都以普通士兵和普通人做主角,我理得你乜鬼綏靖政策、馬其諾防戰、閃擊戰丫,呢個Moment我被困係呢個海灘死角之內,只係想快快趣趣搭船走人咋!

相關文章

本週熱點