俾我都會馬上踎低幫條女綁鞋帶︱黃一恒

【2017年09月24日 2:34 下午】俾我都會馬上踎低幫條女綁鞋帶︱黃一恒


早幾日睇到某個facebook專頁貼左張係理大個男仔踎低幫個女仔綁鞋帶,被主編拿來公審,配詞:「韓劇上腦,搞到d港女殘廢就係呢d害群之馬!」

我有朋友都Share,亦有人附和,大致上都係話做乜依家啲男仔係咁寵壞啲女仔,港女是這樣煉成的,之餘此類。但我係村民一份子,就唔係咁諗,因為換著係我,睇到條女甩左鞋帶,我都會馬上踎低幫佢綁。呢個跟咩野Gentleman呀,好Sweet呀,未必有好大關係,而係好實際地講,係唔抵得條女甩住鞋帶吊吊揈,都大模斯樣係條街度繼續行,遲早仆埋街就阿吱阿咗。

鞋帶甩左咪馬上綁番囉,咁簡單嘅嘢,啲女係唔係殘廢架?我講你聽有時啲女堅係會咁做,但原因唔係殘廢,而係男女真係有差異,冇得好講。有啲男人認為好簡單嘅動作,例如綁條鞋帶,對女人來說係件難事。以下我列出一些可能性:

1. 個女仔貧血又發作踎低起身即暈,係即刻暈呀,唔係講笑架。
2. 如果撞啱果日姨媽到,踎低起身呢種算係超大動作。
3. 撞啱整傷腳,踎低起身腳會痛。
4. 果日著住條短裙唔方便踎低起身。
5. 基於上述原因,覺得自己行慢啲冇咁易仆街。

而通常就係有咁啱得咁橋,行行下真係仆左街,然後發老脾,連帶果日成日去街嘅心情都冇曬。你可能果日人生規劃左同條女睇場好戲,然後訂左個靚位去朋友間餐廳度捧下場,點知就係因為條女冇綁好鞋帶仆左街,整日西口西面對住你,你都冇癮啦,咁你下次見到條女甩左鞋帶仲唔拿拿聲踎低幫佢綁好佢?

乜啲女咁煩架?當然冇話條條女都係咁,一樣米養百樣人,但有啲男女普遍存在嘅差異,男人唔仔細留意未必會發覺,並且未必個女仔會咁直接話俾你知,可能覺得唔好意思啦。例如姨媽到個日,有啲女踎低起身都足以令佢擔心啲血好似山洪瀑發咁瀉出來,搵個地方換衛生巾又擔心外面啲公廁地方唔衛生。有啲女仔未必會直接開口講有呢啲煩惱。

我覺得一對Couple,首先係生活上嘅Partner,好多嘢就係咁樣互相扶持,兩個人相處就係咁樣生活點滴互相照應一下,所謂一起過日子,不外如是。至於你話特登拍條片由香港飛去臺灣接女友放工,全程放上網曬命,呢啲正一做戲咁做。當然,人生做啲傻嘢大家第日有得笑下,係無可厚非,但兩個人相處,能否湊合過日子,先至係王道!

唔好話男人寵壞港女啦,男人在生活上有好多瑣碎事冇做好,條女睇唔過眼幫你做左,大把啦,大家不妨仔細留意一下,講出一兩件。


標籤:

相關文章