美容騙子︱黃一恒

【2017年10月24日 12:07 下午】美容騙子︱黃一恒


無事獻殷勤,下一句係乜,我地由細聽到大,這句話包藏左千百年來人類累積嘅智慧同經驗,但到今時今日偏偏仲有人做招,講到尾,係因為受害人有貪念,貪字得個貧這番話又係由細聽到大。我咁講分明係要Blame the victim,又如何?我只希望你唔會做下一個受害人。其實只要大家用常識諗一諗,就會覺得有古怪,避免墮入騙子設下嘅糖衣陷阱。當冇人再受騙,騙徒冇得撈,大家自然諗下不如腳踏實地做番正行,情況跟我地勸人唔好俾錢街上嘅丐幫乞兒一樣,因為你俾錢等同鼓勵丐幫集團擴充業務。

美容騙子目的只有一個,就係呃你錢,佢地男女都呃,一於殺無赦!以前美容騙子專呃女人錢,唔知係因為近日啲女人警覺性高左冇咁易呃丫,定還是想開拓男人市場,總之現在男女通吃。我相信戴口罩開記者會果幾位哥仔,只係冰山一角。

呃女人錢嘅手法,就聽得多啦。就俾張免費Coupon妳上去試做,又或者叫妳朋友介紹妳上去用超特惠價試做。妳朋友本身未必係騙徒,佢只係美容院個現有客仔,被利用來做餌。一來,妳自己覺得好抵;二來,妳覺得無法拒絕好朋友嘅熱情邀請,佢當我係friend有好嘢先至介紹我去遮,唔去咪好衰,況且我自己都想試下,但平日好貴,今次有得咁平做,唔去咪好笨?點都好,騙徒總會幫妳編造個藉口上去佢間乜乜會所,入到房就除曬妳啲衫,實行困獸鬥,再搵人用車輪戰術係咁氹妳碌爆卡買套票,卡都碌爆仲可以立即安排埋財務公司借錢俾妳一條龍服務。

至於呃男人嘅手法,最近嘅新聞講得好清楚。先搵個女騙徒去同你扮friend,讚你靚仔、讚你煮嘢食叻、讚你體貼,總之就總會幫你搵到個理由覺得自己吸引到異性。然後個女騙徒又會編個理由要妳出黎陪佢,俾朋友放飛機呀,剛剛屋企發生咩事呀,總之令你有英雄感,俾機會你做好人。喂,個女仔係佢最需要人陪佢時候,我能夠出現喎,仲唔得米!總之出到黎,又係上美容院,你進入左佢個陷阱,佢嘅行騙手法跟上文呃女人嘅方式一模一樣,總之就係威迫利誘,用群眾壓力。當然啦,呃男人又多一種手法,就係約你上去個女騙徒可以扮可憐,或者用「叫你做小小嘢都唔肯,做男仔唔係咁唔大方丫嘛」嘅戰術!

呃女人錢又好,呃男人錢又好,美容騙徒之所以能夠成功,源自你當初以為有著數。要避免墮入陷阱,只要想一想「邊有咁大隻蛤乸隨街跳」,你就唔會浪費時間出來跟人去左乜鬼美容院。萬一真係唔小心中計跟人上左去,你俾人圍果陣,你同佢鬥賴皮就得。總之講到錢你一定Say No,不管佢用激將法又好,過左今日就失去優惠機會戰術又好,總之你就死都話無錢、無信用咭、信貸評級係負數根本問唔到財仔借錢。面對騙徒,你唔駛怕冇面架,俾人呃曬啲錢要蒙住面開記者會才叫真冇面!

相關文章

本週熱點