關於林過雲假釋︱吳廣明

【2018年01月23日 5:29 下午】關於林過雲假釋︱吳廣明


今日突然收到一位報界朋友問我,有無聽到林過雲得到假釋,我即時是答唔到,因為,若果所謂得到假釋,也不會即時知道幾時出冊。幾經辛苦,問相關的舊伙記,暫時係未聽到佢有釋放的消息,相信,明天報紙都可能會有進一步消息。一定是因為網上紅人雲海前輩在下午三點左右出左個相關消息的帖,我不知道這位報界朋友是否看了就打電話給我。

從大家的回應我看得出,大家都認為林過雲是有精神病,若果以他目前處境來看,這消息並不準確,因為,若果患有精神病的終身犯人,會放在懲教署管轄的小欖精神治療中心,放在這個中心的犯,要出來是要經過一個和精神科有關的委員會審核,一般都不會有人敢批准放人。

根據香港法例第221章「刑事訴訟程序條例」第67B條,法官在就某罪行而判處任何人酌情性終身監禁刑罰時,須指明該人就該罪行而必須服的最低刑期, 以作為該刑罰的部分。法官判被告終身監禁,而最低服刑期是 20 年,係未計被告在獄中因行為良好而可得到最高刑期1/3嘅「刑期扣減」 (即俗稱扣假期), 扣除1/3「刑期扣減」,被告嘅實際最低服刑期係160個月 (20年=240個月),但不代表佢坐完160個月就走得。

根據香港法例第524章<長期監禁刑罰覆核條例>,所有終身監禁或刑期10年或以上嘅犯人,在坐咗最低刑期後嘅6個月內,佢個case會交由「長期監禁刑罰覆核委員會 (LTSRB)」去覆核佢嘅刑期 (俗稱 “見board")。其考慮因素包括佢獄中表現、家庭支持、重犯機會等。再由LTSRB訂立一個 「確實刑期」 (即係由終身監禁轉做有期徒刑) 及出獄後嘅監管期限 (俗稱 「狽噹噹」),坐完確實刑期及過咗狽噹噹後,先可算服刑完畢。

但每年只可見board一次,亦唔係見一次就有決定。根據經驗。一般終身監禁。如果最低服刑期是 20 年,減埋刑期扣減,見 2-3次 LTSRB,最少都坐 24 – 28年先出得番嚟。現時終身監禁最低刑期紀錄係坐18年就出得番嚟,條友在獄中讀咗會考+2個學位,又教畫畫、又教音樂、從無犯事,家人極度支持個個月探足監… 先可以咁快走得,聽聞而家做緊星級紋身師傅。

林過雲就是屬於以上那種終身犯,據我所知,他在大約是十多年前左右開第一次Board,也引來一翻討論,但我記得當時我還在職,朋友問起,我就話無可能。現在事隔二十多年,相信最近佢應該開過次Board,因為有人通風報訊出來,據我所知,當開Board之後,會有一個刑期,一定還最少有六個月到一年左右。我記得在96年,參加過實一份報告,是關於一名終身犯,後來就在兩年左右才出冊。

當然,對於林過雲的所作所為,一定令好多人認為他不應該得到出獄,但據我所知,到目前還未有一個犯人是不能出冊,有說當年的金魚佬是死於獄中,這個我記得不是,他都經過好多次覆核,不知道什麼原因給他刑期後出獄。若果按目前的制度,林過雲是有機會出冊,只是視乎何日,我無記錯林過雲今年是六十歲過外,若果再過幾年,一切的報告都好的話,應該和其他終身犯人一樣。

和林過雲是有踫面,是1983年,我剛獲得委任做見習幫的時候。也給大家看看小弟當年的樣子。


標籤:

相關文章