李永達嘲湯家驊走上狄志遠之路更沒政治智慧

【2015年02月07日 12:40 下午】李永達嘲湯家驊走上狄志遠之路更沒政治智慧


政改方案的膠著狀態令湯家驊正自憂心忡忡,怕政改方案原地踏步,於是出動約見遊說在政改方案上無話事權的譚志源,覺得如泛民只要不堅持推翻831人大決定,反建議2020爭取中央願意廢除功能組別及2022年重啟政改五部曲。但泛民的綑綁性否決到底的立場令湯家驊揪心,批評泛民無政治智慧,無人有資格做特首云云。對此,民主黨李永達認為湯家驊只是一廂情願,無底線的退讓只會步上狄志遠的後塵。

李永達接受本網的視像採訪稱,湯家驊向來有性格而高傲,把世事都看透了一樣,但想法太單向,要反躬自省。他指出,泛民由最進步,最溫和的如十八學者方案,以至是最親中如劉佩瓊那些方案,北京接受了哪一個呢?「Ronnie 係神女有心,襄王無夢,立場不斷退讓是無意思的,Ronnie 也自知,所有泛民同大陸佬都有中間人討論及來往,阿Ronnie 要自問,邊一個中間人向佢轉達過有妥協嘅訊息呢?」

「Ronnie 而家係咩情況呢?我地就開價一百,阿爺係零,Ronnie 退到50,阿爺唔接受,退到25,又唔接受…最後減到1,終於接受。咁係咪溫和,有智慧嘅做法呢?咁可能佢覺得好有智慧囉,我覺得呢個智慧好儍囉,我地唔係活在一個冇接觸嘅世界黎呀嘛,你連陳弦毅都唔接受。但零分到1分,施捨一分你,就妥協嘅話,呢個唔係妥協黎喎,咁你就好似狄志遠咁樣,跟晒共產黨路線… 咁你要學狄志遠嘅話,我唔怪你嘅,但你仲係民主派,啲人就會問囉。上面我都知道有人同湯家驊傾計架嘛,我想問佢喇,究竟上面有冇任何訊號,話你地退到某個位就會接受你呢?我估就冇喇。其實佢講呢啲(泛民無政治智慧),令我好surprise 囉,我又唔會話自己好有政治智慧,但我唔覺湯家驊呢個評論好有智慧囉。唔通你話共產黨好有智慧咩?共產黨嗰啲唔係智慧嚟㗎嘛,佢係强權等於公理嘛,佢係强權!」

李永達在訪問中,亦談及最近民主黨黨慶被梁振英杯葛事件,他說其實民主黨從來無請CY,說他下達指令不讓司局級官員來,是梁振英好鬥而小器,攪到官員變左冇晒自由,俾中聯辦還差,因今年的中聯辦新春酒會都接受堅持平反六四的泛民議員。對於梁振英的所謂兩個杯葛的原因,民主黨叫689下台及黨慶屬籌款性質,他認為黨慶從來都有籌款,梁振英上台之初都有攪遊行叫他下台,認為這些理由都不是理由,只是擺强硬姿態給中央看而已。

對於大專界有反大中華派之風,像浸大學生會候選內閣拒絕出席六四集會,令六四從前是民主派的資產,有可能一朝變成民主派的負債的滅頂之機,民主派是如何應對呢,請點擊看視頻啦!


相關文章