青年新政講清楚自己唔係泛民就好了|黃一恒


【2015年12月07日 10:30 上午】青年新政講清楚自己唔係泛民就好了|黃一恒


新界東補選之初選協調爭議,講黎講去毫無益處。第一日,我已經提出一個最基本的問題,到底新民主同盟係唔係泛民主派的一員?

大佬呀,我地講緊初選,初選係咩呀?就係俾同一個黨,又或者同一陣營的人,去競逐代表此陣營出選的權利。如果某黨某人,根本不屬於這個泛民主派陣營,根本無從談起是否參考民主派初選。這是最基本的做人邏輯,政治倫理ABC。

初選只供同一陣營內的人競逐出選權

曾經有朋友問:加入泛民是否要填申請表呀?邊個泛大佬咁霸道可以介定某黨某人不屬泛民?我提出一個更基本的問題:首先,這個黨派的人,是否認同自己屬於泛民一員先?

當年希拉里和奧巴馬,在美國民主黨初選都鬥到難分難解。但佢地二人都認同自己屬美國民主黨一員架。唔會有一個茶黨的人走去參加民主黨初選!

如果係香港,某人連自己都唔認同係泛民,講泛民初選,曬氣啦。我一直希望青年新政自己向公眾講清講楚,唔駛大家估估下。【蘋果日報】一篇題為《青年新政:公民黨非同路人》的報導,令事件明朗化。報導引述青年新政召集人梁頌恆在電台節目中表示,公民黨並非其同路人。

當然,你同一個人同唔同路,可以有好多定義。但當我地講到選舉,定義就十分清楚:既然不是同路人,就沒有協調初選的理由。

公民黨一早就有派人參加新界東補選的意向,而公民黨的候選人,既是代表公民黨自己,同時亦係代表整個泛民主派去參加補選。其目的,就是要守住泛民主派在立會內的關鍵否決權,避免建制派修改議事規則。

公民黨是泛民

在選舉上,青年新政既然不認同公民黨是同路人,那麼就可以推論,青年新政同樣不認同自己屬於整個泛民主派。事實上,在2015區議會選舉前夕,青年新政已拒絕參加泛民主派的協調機制,在有多區建制派自動當選的情況下,青年新政依然跟泛民主派候選人同區競選。乜嘢泛民主派霸住啲區,阻住青年人參政的歪論早已不攻自破。大把無競爭的區唔去選,青年政偏要跟泛民候選人對陣,行為上已宣佈自己不屬於泛民主派。而這次梁頌恆更言論上公關講明青年新政不是泛民,咁好呀,講清講楚,唔好令市民混亂。

梁頌恆又話,在泛民政黨中,只認同范國威及其新民主同盟是同路人。有朋友話,明做范國威世界,實在其心可誅!但香港市民睇通睇透,無咁容易俾佢渾水摸魚。

范國威冇咁容易俾你拉落水

范國威同新民主同盟對泛民的態度十分明確。Day One范國威等人退出民主黨自立門戶,講明係因為民主黨當時在政改的態度。而新民主同盟自成立,從來無話過脫離泛民,而泛民亦由始認同佢地係一員。新民主同盟2015區議會選舉大勝,當然因為其黨人努力,但同時亦因為泛民協調機制真的有效,避免泛民候選人互相對陣。

唔似得青年新政,係人係鬼都分唔清,古古怪怪,一日到黑,就只係高呼本土前本土後。政治論述當然重要,而在香港目前社會環境,宣揚以香港本土利益為依歸的理念實屬無可厚非。然而,作為一個人,或壓力團體,可以點講都得。但當我地要參選時,就必須要遵守一套政治倫理,跟遊戲規則去玩。青年新政唔認同自己係泛民,又成日聲大大要泛民同你傾立法會補選之初選,到底搞乜?

青年新政行事偏離常識同埋邏輯,只會讓市民大眾質疑佢在混淆視聽!總結一句,既然青年新政不認同自己屬於泛民,新界東補選泛民主派有冇初選都唔關青年新政事。


相關文章

本週熱點

最新文章