一個西九毀掉地鐵童年回憶︱黃一恒


【2017年01月10日 2:39 上午】一個西九毀掉地鐵童年回憶︱黃一恒


依家真係越睇越傷心,唔係講笑架。

我嘅童年,要數我嘅快樂嘅成長回憶,不能沒有地鐵!先講「搭地下鐵路話咁快就到!」呢句經典電視廣告口號丫。果時嘅廣告,堅係廣告,係會深入民心,一句口號,一個畫面,足可帶領熱潮,更長遠成為香港人的永恒回憶。唔似得依家政府浪費公帑亂賣廣告,仲鬼鬼鼠鼠話係乜鬼展覽。

事實上這句經典地鐵廣告口號一啲都唔誇張,相對於經常塞車的路面,坐地鐵那種順通無阻的感覺,的確讓人覺得話咁快就到。

細個果陣,相對於迫熱狗巴士,搭地鐵有冷氣歎,堅係爽過DeeDee架。而我細個過陣,垃圾蟲廣告十分流行,可見當時香港人的公德心有待改善,街上周圍都有好多垃圾,相比之下,地鐵這座地下城堡卻周圍都很整潔乾淨,教人心曠神怡。

到我長大一點,升上中學和大學,地鐵唔單只係我嘅交通工具,仲係貼身寶貝,因為每個學生都會申請一張地下鐵路學生乘車證,持證除了享受乘車優惠外,這張證還儼然成為大家的學生證,去到邊度,只要拿出地鐵證,就可以獲得學生哥獨有的待遇,享受各種福利,真可謂「一咭傍身,世界通行!」當時我們這些貧苦學生,不像現在的學生般真的可以周遊列國遊學交流。能夠搭下地鐵,離開一下自己居住和上學的社區,去別的地方走走,多認識這個社會,已算是擴闊了我們的世界觀。

地鐵雖是一間公司,卻十分貼地,貼近大家的生活,而且擔起很重要的社會功能,教我如何不愛它?我大學時修讀公共行政,經常研究Good Governance(良好管治)這個課題,現在想來,一個政府能夠透過地鐵這種半官方的公司,實踐了三個E,令普通市民自小可以好經濟實惠地坐車出入(Economic)、能夠迅速到達要去的地方(Effecient)、能夠透過地鐵有效地建立市民對社會的歸屬感(Effective),這就稱得上是Good Governance了。政府管治得好,市民怨氣自然較小,過了很久人們仍然會懷念政府曾經有過這麼良好的管治,這遠比向大家硬銷甚麼國民教育好得多!

反觀現在,政府行事大石壓死蟹,明明自己破壞程序公義在先,質你食屎仲要你叩頭射恩,更亂花公帑狂賣廣告催谷,大家又點會信服?講回地鐵公司,自從變成港鐵之後,日日故障卻年年加價,便民的本業未做好就不斷超支起高鐵耗盡民脂民膏,最新一筆就做擦鞋仔,配合政府亂賣突兀的西九故宮廣告。呢個廣告堅係好肉酸,彰顯特區賊政府跟古代皇帝一樣霸道礙眼,昔日孫文在香港謀劃革命事業就是要讓人類擺脫這種奴隸枷鎖。天安門畫面勾起多少香港人的六四傷痛回憶,大家走出來「參觀展覽」,現在港鐵連城管都撈埋,派大批黃衣職員滋擾途人,場面極度難看,一個西九就將我兒時對地鐵的美好回憶徹底毀滅。

原圖改自理大學生報編委會


相關文章

本週熱點

最新文章