佔領區議會之 – 十萬青年十萬軍, 大家一齊搵真銀!|蕭少滔


【2015年08月24日 11:27 上午】佔領區議會之 – 十萬青年十萬軍, 大家一齊搵真銀!|蕭少滔


維穩真係勁好賺, 有錢梗要袋住先!
各位巴打唔去佔領區議會就真係有錢都唔識執呀嗱, 咪話我唔一直提醒你: 63萬合同, 只要求3萬個 like….. 其實扣晒燈油火蠟人工架生, 即使豪夠5蚊搏你5, 買夠3萬個 like 都只係要15! 仲要俾足你成年時間交貨喎! 選舉年, 真係特別多蛤乸隨街跳…. 定還是係七月….特別猛?
話說葵青區議會大搞「長者FB」,被揭發竟然有40% Like 來自台灣 (唔通咁多老人家移咗民?),而後知後覺嘅民主黨區議員林立志要去問民政處,先至搞到「服務供應商」份合同被公開。原來係有「硬任務」嘅,就係要好似儲印花咁,一年要攞夠3萬個likehttp://hk.apple.nextmedia.com/realti…/news/20150821/54113283
葵青 FB
咦? 扣埋買 like,點計都淨袋30萬應該冇走雞啦啩? 最正嘅係….. 咁鬼低B 嘅嘢, 使得你幾多功夫吖? 係啲唔識玩 FB 嘅廢老先至會俾人當水魚咁劏嘅啫….
計我話, 各位青年佔領區議會嘅動力“, 唔止係月入幾皮, 另加津貼、全天候冷氣房打機、實報實銷買電腦、旅遊資助、一億地區撥款起怪獸地標同埋唔摭雨涼亭……另外一個額外 jackpot , 就係狂碌呢種維穩卡。各位真人不露相嘅鍵盤戰士福音全部有工開!真係爽過豬籠入水呀。
班廢老一邊話網上群組唔代表沉默嘅大多數“, 一邊又搏晒老命泵錢谷 FB? 咁精神分裂都有呢吓
, 一於搵個巴打出嚟捱義氣, 拎住選票佔領區議會, 其他就包抄外圍, 專接呢種維穩生意。反正都係交下數嘅啫。咁就齊齊搵真銀啦喂, 到時仲邊度有廢青?
假如要聆聽真正嘅沉默大多數, 其實應該去和合石就啱嘞, 使乜搞咁多大龍鳳吖? 之咁 …. 班廢老慢咗啲囉! 【墳場新聞】 早就去咗陰間插旗。咦? 又話有人行得快過電車呢吓? 去墳場種票又唔見你行快兩步? 既然電燈柱都可以登記到做選民地址, 冇理由歧視個山墳石碑啫?
之不過,葵青區議會咁樣做, 都係基於強烈嘅愛國心、同埋幫手掩護中聯辦撤退! 大家要明白 : 西環爆響口, 話香港嘅騙案主要係中國人受到台灣嘅脅持, 嗱, 而家自行交代:流量真係主要來自台灣! 葵青區議會, 真係好愛國!

標籤:

相關文章

本週熱點

最新文章